Defender l’asturianu

Sofitamos el movimientu en defensa l’asturianu y la manifestación d’esti sábadu 21 de abril.

La diversidá llingüística ye una riqueza pa la sociedá que tenemos que caltener. Una llíngüa ye la mayor espresión de una cultura y la diversidá cultural y de pensamientu faz a la sociedá más resiliente y más capaz.

Pedimos tener el derechu de falar como falaren les nueses güeles, igual que defendemos el derechu de ca ún a falar con la llíngüa que más-y preste.

El asturianu y la fala son patrimoniu nuesu de toles persones que vivimos n’Asturies y por eso llamamos a participar esti sábadu nun actu pacíficu y democráticu de reivindicación de los nuesos derechos. Queremos que esa manifestación sía una romería que ayude a unir a la xente de Asturies al rodiu de un obxetivu común, un proyeutu de convivencia pacíficu y respetuosu coles diferentes formes de falar, de pensar, de sintir, un proyeutu afayaizu como siempre fue la nuesa tierra. Un proyeutu que queremos dientro de nuna Europa los pueblos, nuna Europa plural y solidaria.

Sofitamos la oficiliadá del asturianu y creemos que agora ye el momentu. Por eso animamos a tul mundu a sumase a la manifestación del sábadu n’Uvieu.

Esti ye el programa:

Y equí el testu escritu por Pablo Texón pa la ocasión:

Tenemos una cita cola Historia,
vamos salvar un idioma ensin llercia
pa que tenga puxu, futuru y fuercia
y pa que nun se pierda na memoria.

Ven con nós, qu’ensin ti nun somos quien,
porque agora tu yes imprescindible,
llograr lo que pidimos ye posible
si tiramos toos nel mesmu sen.

Esti ye’l momentu, va ser agora,
querémoste con nós, esta ye la hora.

Esti ye’l momentu, va ser agora,
vamos toes xuntes, esta ye la hora.

Sabes que les cais esperen por ti
y que l’aire aguarda los tos glayíos,
vamos caminando toos xuníos,
la nuestra oportunidá yá ta equí.

Na cai, en casa, nel trabayu, na escuela
lluchamos arguyosos p’algamar
que les nuestres nietes puean usar
aquello que nos regaló la güela.

Esti ye’l momentu, va ser agora,
querémoste con nós, esta ye la hora.

Esti ye’l momentu, va ser agora,
vamos toes xuntes, esta ye la hora.

Deja un comentario